Risavaxinn gosmökkur stígur til himins

Um fimm kílómetra hár gosmökkur stendur upp frá eldfjalli í Indónesíu í dag. Mikið öskufall er í nágrenni fjallsins og er verið að dreifa grímum til íbúa í nágrenni þess.

Eldfjallið Sinabung er á eyjunni Súmötru. Þar hófust gos árið 2010 og árið 2016 gaus það með látum og hlaust mannskaði af. Enn á ný er fjallið tekið að rumska og síðustu daga hefur virknin verið töluverð. 

„Þetta er stærsta gosið í Sinabung í ár,“ segir Kasbani, yfirmaður eldfjallamiðstöðvar í Indónesíu. Líkt og fleiri landar hans ber hann aðeins eitt nafn.

Engar tilkynningar hafa borist um mannfall eða meiðsli á fólki. Enginn býr í næsta nágrenni fjallsins þar sem því svæði hefur verið lokað fyrir nokkru. En hundruð manna búa rétt utan hins skilgreinda hættusvæðis og er það svæði nú þakið ösku.

Í sumum þorpanna er skyggni innan við fimm metrar. Óttast er að þrýstingur í fjallinu verði til þess að það hrynji.

• Blogga um frétt