Líkamsleifar 66 manns, þar af 22 barna og 12 kvenna, hafa fundist í átta þorpum í norðvesturhluta Nígeríu síðustu daga. Öryggissveitir hafa handtekið nokkra í tengslum við líkfundinn, samkvæmt upplýsingum frá Nasir El-Rufai, ríkisstjóra í Kaduna.
Mikil reiði ríkir innan þorpanna en Rufai hefur hvatt þorpsbúa til að sjá að sér og forðast árásir í refsingarskyni.
Ekkert hefur verið gefið upp um hina grunuðu eða af hverju morðin voru framin. Forsetakosningar fara fram í Nígeríu á morgun og ekki er útilokað að tengsl séu þar á milli.
Muhammadu Buhari sækist eftir endurkjöri en hann er 76 ára gamall og er að ljúka sínu fyrsta kjörtímabili. Frambjóðandi stjórnarandstöðunnar er Atiku Abubakar, fyrrverandi varaforseti landsins. Kjósendur í Kaduna eru vinsamlegast beðnir um að sniðganga allt ofbeldi og ganga til kosninga í sátt og samlyndi.