Fyrrverandi forseti Perú látinn

Fyrr­ver­andi for­seti Perú, Alan García, er látinn. Hann skaut sjálf­an sig í höfuðið í þann mund sem lög­regl­an birt­ist heima hjá hon­um snemma í morgun og hugðist hand­taka hann. Hann var flutt­ur á sjúkra­hús í borg­inni Lima þar sem hann gekkst und­ir aðgerð á höfði. Hann lést af sárum sínum á sjúkrahúsinu.

Frétt af mbl.is

Fyrrum forseti skaut sig við handtöku

„Alan García er látinn, lengi lifi Apra,“ segir Omar Quesada, framkvæmdastjóri APRA, flokks García, og jafnframt elsta stjórnmálaflokks landsins.

Garcia gegndi embætti for­seta á ár­un­um 1985 - 1990 og aft­ur 2006 - 2011. Hann sæt­ir lög­reglu­rann­sókn vegna spill­ing­ar í op­in­beru starfi. Hann er sakaður um að þiggja mút­ur af bygg­inga­fyr­ir­tæk­inu Odebr­echt í skipt­um fyr­ir verk­efni á veg­um rík­is­ins.  

Hann hef­ur ávallt neitað sök í mál­inu. Í nóv­em­ber sótti hann um hæli í ung­verska sendi­ráðinu. Mánuði síðar var hon­um gert að yf­ir­gefa það því hon­um var neitað um hæli.

Garcia er einn af fjór­um fyrr­ver­andi for­set­um lands­ins sem er flækt­ur í stór­fellt spill­ing­ar­mál. Hinir þrír eru Pedro Pablo Kuczynski, Oll­anta Humala og Al­ej­andro Toledo. Fregnir bárust af því fyrr í dag að Kuczynski var fluttur á sjúkrahús sökum hás blóðþrýstings. Hann var handtekinn í síðustu viku í tengslum við spillingarmálið og var úrskurðaður í gæsluvarðhald til 20. apríl.

Pedro Pablo Kuczynski, einn fjögurra fyrr­ver­andi for­set­a Perú sem er flækt­ur í stór­fellt spill­ing­ar­mál. Kuczynski var fluttur á sjúkrahús í dag sökum hás blóðþrýstings, sama dag og Alan García skaut sig í höfuðið þegar lögregla hugðist handtaka hann. AFP

• Blogga um frétt