Forseti Bandaríkjanna, Donald Trump, mun koma til Bretlands í þriggja daga opinbera heimsókn í júní. Þetta kemur fram í tilkynningu frá Buckingham höll. Forsetinn er væntanlegur, ásamt eiginkonu sinni Melania Trump, 3. júní.
Þau verða gestir Elísabetar drottningar og verða viðstödd ásamt henni minningarathöfn um D-daginn svonefnda í Portsmouth. Að morgni D-dags fyrir 75 árum, 6. júní 1944, sigldu 370.000 bandarískir, breskir og kanadískir hermenn og sjóliðar á 5.300 skipum upp að Normandí-strönd Frakklands. Um kvöldið hafði öflugur her bandamanna brotizt gegnum Atlantsmúr Þjóðverja og tryggt sér verulega fótfestu á 60 mílna löngum kafla. Á aðeins einum lendingarstað af fimm mætti innrásarliðið alvarlegri mótspyrnu, en jafnvel þar urðu Þjóðverjar að lúta í lægra haldi. Stríð á nýjum vígstöðvum var hafið og um leið upphafið að endalokum Þýskalands nasista,segir í frétt sem Guðmundur Halldórsson skrifaði í Morgunblaðið fyrir 25 árum síðan.
Trump mun einnig funda með Theresu May forsætisráðherra í Downingstræti.
Trump hitti Elísabetu drottningu að máli í Windsor kastala þegar hann kom til Bretlands í júlí 2018 en það var ekki opinber heimsókn. Frá Englandi fer hann til Skotlands en þar á hann golfklúbb.
May segir heimsóknina í júní gefa færi á að styrkja tengsl ríkjanna tveggja sem þegar eru náin á ýmsum sviðum.