Öflugur jarðskjálfti af stærðinni 6,5 skók sunnanverðar Filippseyjar í dag og kostaði að minnsta kosti fjögur mannslíf. Þetta er þriðji mannskæði stórskjálftinn á Filippseyjum á síðustu tveimur vikum.
Margar byggingar eru stórskemmdar eftir skjálftana og þúsundir hafast við í neyðarskýlum.
Helst varð áhrifa skjálftans vart á eyjunni Mindanao, en þar tóku íbúar víða á rás til þess að leita skjóls er skjálftinn gekk yfir.
Átta manns létust í skjálfta upp á 6,6 stig sem reið þar yfir á þriðjudag og að minnsta kosti fimm létust í skjálfta sem var 6,4 að stærð, 16. október.