Áfrýjunardómstóll á alríkisstigi í Bandaríkjunum úrskurðaði í gær að fyrrverandi fangar í Flórída geti ekki tekið þátt í kosningum nema þeir hafi borgað allar sektir sem þeir kunna að skulda Flórídaríki, en búist er við að ríkið muni leika lykilhlutverk í komandi forsetakosningum.
Talið er að úrskurðurinn geti haft áhrif á hundruð þúsunda mögulegra kjósenda í Flórída, þar sem kannanir hafa sýnt frambjóðendurna Trump og Biden hnífjafna.
Nærri nauðsynlegt er talið fyrir forsetann núverandi að vinna sigur í ríkinu og fá þar með 29 kjörmenn þess, ætli hann sér að halda áfram í embætti.
Árið 2018 samþykktu kjósendur í Flórída breytingu á stjórnarskrá ríkisins, sem leyfir föngum að fá aftur kosningarétt um leið og þeir ljúka afplánun.
Ríkisþingið, þar sem repúblikanar ráða ríkjum, brást við með því að keyra í gegn lög sem kveða á um að allar sektir, kostnaður og annað sem fyrrverandi fangar geta skuldað ríkinu þurfi að vera greitt til að þeir fái þessi réttindi á ný.
Dómstóll á neðra dómstigi skar svo úr um að þau lög brytu gegn stjórnarskrá. Nú hefur æðri dómstóll snúið þeirri niðurstöðu við.