Sandra Day O’Connor, sem var fyrsta konan til þess að gegna starfi dómara í Hæstarétti Bandaríkjanna, er látin 93 ára að aldri.
Þetta tilkynnti dómstóllinn í dag en þar segir að O’Connor hafi látist vegna fylgikvilla sem tengjast elliglöpum. Bandaríski fjölmiðillinn CNN greinir frá.
Afrek O’Connor urðu mörgum kvenlögfræðingum innblástur, þar á meðal þeirra fimm sem hafa gegnt starfi hæstaréttardómara í landinu á eftir henni, en yfirgnæfandi meirihluti hæstaréttardómara hafa verið karlar.
O’Connor var meðal þeirra hæstaréttardómara sem árið 1992 áréttuðu rétt kvenna í landinu til þungunarrofs, sem fólst í máli Roe gegn Wade árið 1973.
Hún lifði einnig nógu lengi til þess að verða vitni að því þegar hæstiréttur Bandaríkjanna afnumdi réttinn í júní í fyrra.
John Roberts hæstaréttardómari lýsti O’Connor sem „föðurlandsvin“ og „harðlega sjálfstæðum verjanda réttarríkisins“.
Árið 2018 upplýsti hún í bréfi að hún hefði verið greind með byrjunarstig vitglapa, líklegast Alzheimers-sjúkdóm. „Þó að síðasti kafli lífs míns með vitglöp getur verið erfiður, hefur ekkert minnkað mitt þakklæti [...] fyrir þær óteljandi blessanir í mínu lífi,“ skrifaði hún árið 2018.
Árið 1981, þegar Ronald Reagan, þáverandi Bandaríkjaforseti, skipaði O’Connor í dómarasætið sagði hann að hún hefði „einstaka eiginleika skaplyndis, sanngirni, vitsmunagetu, auk hollustu við almannaheill sem hefur einkennt þá 101 starfsbróðir sem á undan henni hafa komið“.
Árið 2005 hætti hún störfum.