Heilbrigðiskerfið hafi brugðist skyldum sínum

Innanríkisráðherra Frakklands segir heilbrigðiskerfið hafa brugðist skyldum sínum þegar kom að því að vakta árasarmanninn sem stakk þýskan ferðamann til bana nærri Eiffel-turninum um liðna helgi. 

Árásarmaðurinn, Armand Rajabpour-Miyandoab, er franskur ríkisborgari á þrítugsaldri, en hann hefur verið yfirvöldum kunnur um tíma og var handtekinn árið 2016 fyrir að leggja drög að árás, sem ekki varð af. 

Fyrir það var hann vistaður í fangelsi í fjögur ár og hefur verið undir eftirliti hjá lögreglu síðan þá.

Frétt af mbl.is

Stakk 24 ára ferðamann

Læknar sögðu hann við góða heilsu

Gerald Darmanin, innanríkisráðherra Frakklands, sagði fjölmiðlum að það hefði klárlega verið brestur í kerfinu. Þó ekki þegar kom að lögreglueftirliti heldur þegar kom að geðrænu eftirliti. 

Þá sagði hann að árásarmaðurinn hefði greinilega verið illa haldinn, en að læknar hafi í nokkrum tilfellum sagt að geðrænt ástand hans væri að skána og að hann mætti vera frjáls ferða sinna. 

Stuttu fyrir árásina birti Armand myndband á netinu þar sem hann sór eið íslamska ríkisins og lýsti yfir stuðningi við jihadista.

Frétt af mbl.is

Árásarmaðurinn sór hollustueið við Ríki íslams

Eftir árásina flúði hann vettvang og kallaði allahu akbar eða Guð er mest­ur. Lögreglan yfirbugaði hann með rafbyssum og er hann nú í gæsluvarðhaldi.

• Blogga um frétt