Vilja binda enda á hernám Gasa

Amnesty International hefur kallað eftir því að Ísrael bindi enda á hernám Gasa og Vesturbakkans, þar á meðal Austur-Jerúsalem. 

Þetta kemur fram í tilkynningu frá Amnesty International. 

Í tilkynningu er kveðið á um að Ísrael verði að: „binda enda á grimmilegt hernám Gasa og Vesturbakkans, þar á meðal Austur-Jerúsalem“.

Einnig segir í tilkynningu að Ísrael hefur haldið Austur-Jerúsalem síðan árið 1967. 

Hvetur öll ríki til endurskoða samskipti sín við Ísrael

Yfirlýsing Amnesty International kemur nú þegar opinber málsmeðferð hefst hjá Alþjóðadómstólnum í Haag til að kanna lagalegar afleiðingar langvarandi hernáms Ísraels. 

Málsmeðferðin fer fram dagana 19. til 26. febrúar.

„Hernám Ísraels í Palestínu er lengsta og eitt mannskæðasta hernám heims. Í áratugi hefur það einkennst af víðtækum og kerfisbundnum mannréttindabrotum gegn Palestínubúum. Hernámið hefur kynt undir og fest í sessi aðskilnaðarstefnu Ísraels sem þröngvað hefur verið upp á alla Palestínubúa. Í gegnum árin hefur hernám Ísraels þróast í varanlegt hernám sem er gróft brot á alþjóðalögum,“ er haft eftir aðalframkvæmdastjóra Amnesty International, Agnès Callamard, í tilkynningunni. 

Þá hvetur Callamard öll ríki til að endurskoða samskipti sín við Ísrael „til að tryggja að þau leggi ekki sitt af mörkum til að viðhalda hernáminu eða aðskilnaðarstefnunni“.

• Blogga um frétt