Minnst 43 látnir í eldsvoða í Bangladess

Að minnsta kosti 43 létu lífið og tugir særðust þegar eldur varð í sjö hæða húsi í hverfi Dhaka, höfuðborg Bangladess, í kvöld.

„Hingað til hafa 43 látist af völdum eldsins,“ segir Samanta Lal Sen, heilbrigðisráðherra Bangladess, í samtali við fréttaveituna AFP eftir að hafa heimsótt sjúkrahús í Dhaka.

Ráðherrann sagði að minnst 40 slasaðir væru á einum spítalanum.

Slökkviliðsmenn bera slasaðan mann úr byggingunni. AFP

Björguðu 75 manns

Mohammad Shihab slökkviliðsmaður sagði að eldurinn hefði kviknað á vinsælum biriyani-veitingastað í Bailey-götu í Dhaka klukkan 21.50 að staðartíma (kl. 15.50 að íslenskum tíma), breiðst hratt út á efri hæðum og króað fjölda fólks inni.

Slökkviliðsmenn náðu tökum á eldinum á um það bil tveimur klukkustundum að hans sögn. Þeir björguðu 75 manns, að því er kemur fram í yfirlýsingu frá slökkviliðinu.

Byggingin hýsir aðallega veitingastaði auk nokkurra verslana.

Slökkviliðið segir að 75 manns hafi verið bjargað. AFP

• Blogga um frétt