Tveggja barna og 35 ára föður þeirra er saknað eftir eldsvoða í húsi utan bæjarins Kilsmo í Svíþjóð. Óttast er að þau séu öll látin.
Tilkynning um eldinn barst skömmu eftir miðnætti í nótt. Fjórum tókst að komast út úr húsinu og létu vita að þriggja væri enn saknað. Sænska ríkisútvarpið greinir frá.
Þegar slökkviliðsmenn komu á vettvang var ljóst að ekki yrði hægt að bjarga húsinu.
Sænska lögreglan telur að það gæti tekið einhverja daga þar til að hægt verður að komast inn í húsið sem er rústir einar.
Talsmaður lögreglunnar segir börnin sem saknað er ekki vera komin á unglingsaldur.