Frelsissviptur í 26 ár rétt hjá æskuslóðum

Karlmaður komst nýverið í leitirnar í Alsír eftir að hafa verið saknað í 26 ár.

Omar bin Omran hvarf í Djelfa í Alsír árið 1990 þegar borgarastyrjöld geisaði og var þá á unglingsaldri. 200 þúsund manns týndu lífi í átökunum og 20 þúsund manns var rænt. Fjölskylda hans vissi ekki hver örlög hans höfðu orðið en óttast var að hann hefði verið drepinn. 

Á dögunum barst lögregluyfirvöldum dularfull ábending. Þar var því haldið fram að Omran væri haldið föngum í fjárhúsi einungis 200 metrum frá æskuslóðunum. 

Þegar lögreglan fór og kannaði málið kom í ljós að ábendingin reyndist rétt. Þar fannst Omran innan um sauðfé, og undir heysátu, en hann er nú 45 ára gamall. 

Íbúi á bænum, 61 árs gamall karlmaður, reyndi að taka til fótanna þegar lögregluna bar að garði en var handsamaður. Er hann nú grunaður um að hafa haldið Omran föngum allan þennan tíma eða í 26 ár. 

Omran er nú í sálgæslu hjá fagfólki sem reynir að rannsaka andlegt og líkamlegt ásigkomulag hans. 

Móðir hans fær ekki að vita hvað varð um drenginn því hún lést árið 2013. 

• Blogga um frétt