2 ára fangelsi fyrir kynferðisbrot

Hæstiréttur Íslands.
Hæstiréttur Íslands. mbl.is/Brynjar Gauti

Hæstiréttur hefur dæmt karlmann í 2 ára fangelsi fyrir kynferðisbrot gegn 14 ára gamalli stúlku. Maðurinn var talinn hafa misnotaði sér aðstæður og brotið gegn trúnaðartrausti sem átti að ríkja í samskiptum þeirra.

Hæstiréttur staðfesti dóm Héraðsdóms Reykjavíkur, sem dæmdi einnig manninn til að greiða stúlkunni 750 þúsund krónur í bætur.

Atvikum er lýst í héraðsdómi. Maðurinn hafði verið úti að skemmta sér í maí á síðasta ári og drukkið ótæpilega. hann kom ölvaður heim að morgni til tveggja sona sinna, sem stúlkan, þá 14 ára, hafði verið að gæta um nóttina.

Í dómnum segir, að í stað þess að greiða stúlkunni fyrir pössunina þegar í stað, svo að hún kæmist heim, hafi maðurinn neytt yfirburðaaðstöðu gagnvart stúlkunni þegar hann fékk hana til að setjast í sófa í stofunni. Þar sýndi hann henni grófa kynferðislega áreitni með því að afklæða hana og reyna að hafa við hana kynferðismök.

Segir í héraðsdómi, að stúlkan hafi  ekki verið þátttakandi í þessum verknaði þar sem hún fraus og varð stjörf af hræðslu. „Er engum vafa undirorpið að ákærði hafi brotið gegn sjálfs­ákvörðunarrétti og athafna­frelsi stúlkunnar og vanvirt friðhelgi líkama hennar til að koma fram vilja sínum. Gerðist hann þannig sekur um ofbeldi og ólögmæta nauðung í skilningi 1. mgr. 194. gr. hegningarlaganna og ber því að sakfella hann fyrir nauðgun," segir í dómnum.

Skynsamlegur vafi þótti hins vegar leika á því hvort maðurinn hafi vitað eða mátt vita að stúlkan var ekki orðin 15 ára þegar hann braut gegn henni.

Við ákvörðun refsingar var litið til þess að verknaðurinn var framinn gagnvart ungri stúlku sem var að gæta barna mannsins. Hann hafi misnotað sér aðstæður og braut gegn trúnaðartrausti sem ríkja átti í samskiptum þeirra. 

mbl.is

Bloggað um fréttina