Héraðsdómur Reykjavíkur samþykkti þá beiðni Reykjavík Developments að matsmaður verði fenginn til að meta kostnað sem fyrirtækið telur að sig hafa orðið fyrir vegna gamla hafnargarðsins við Austurbakka í miðbæ Reykjavíkur, sem er á byggingasvæði fyrirtækisins.
Reykjavík Developments hafði áður krafist þess að Minjastofnun greiddi, fyrir hönd ríkisins, 600 milljónir króna í bætur vegna þess kostnaðar sem fyrirtækið hefði orðið fyrir vegna afskipta stjórnvalda af byggingaframkvæmdum.
Hafnargarðurinn var færður árið 2015 að frumkvæði Sigmundar Davíðs Gunnlaugssonar, þáverandi forsætisráðherra.
Í matsbeiðninni sem Héraðsdómur samþykkti, er m.a. farið fram á að metinn verði heildarkostnaður Reykjavík Developments af fornleifarannsóknum og undirbúnings- og eftirvinnslu vegna hafnargarðanna tveggja sem voru undir bílastæðinu. Einnig var farið fram að metinn yrði sérstaklega kostnaður við hvorn hafnargarð fyrir sig, en sá eldri var reistur á 19. öld og sá yngri á fyrri hluta 20. aldar.
Þá kröfðust Reykjavík Development að metið yrði hvaða áhrif krafa Minjastofnunnar hefði haft á kostnað fyrirtækisins, kostnaðinn sem rýrnun bílastæða feli í sér, auk þess sem metið yrði hversu mikil áhrif forsætisráðuneytisins hafi haft á það að uppsteypa við framkvæmdirnar tafðist.