Ófært er á bæði Klettshálsi og Kleifaheiði á Vestfjörðum, en þæfingsfærð á Mikladal og Hálfdáni þar sem er stórhríð. Þungfært er á Þröskuldum og á Steingrímsfjarðarheiði og beðið með mokstur að því er fram kemur á vef Vegagerðarinnar.
Él eru á Norðurlandi og er þæfingsfærð á Öxnadalsheiði, Siglufjarðarvegi og Hófaskarði. Ófært er um Dalsmynni en þungfært inn í Fnjóskadal og eins á Hólasandi.
Á Austurlandi er Fjarðarheiðin þungfær og þar er mjög blint. Flughált er á köflum á Héraði. Ófært er á Vatnsskarði eystra og Öxi.
Snjóþekja eða krap er á flestum vegum á Suðurlandi, þ.á.m. bæði Hellisheiði og Þrengslum.
Hálka eða snjóþekja er víða á Vesturlandi og sums staðar snjókoma. Ófært er á Svínandal. Þungfært er á Fellsströnd og Skarðsströnd.