Gefin hefur verið út reglugerð um makrílveiðar í ár og er alls úthlutað tæplega 135 þúsund tonnum.
Frá þeirri tölu dragast rúm níu þúsund tonn vegna bráðabirgðaákvæða og 1.500 tonn vegna framlags til Rússa, skv. samkomulagi sem gert var í vetur. Ekki er samkomulag um stjórnun makrílveiða í NA-Atlantshafi.
Að mestu leyti er reglugerðin í samræmi við það sem gilt hefur undanfarin ár. Þó er sú breyting gerð á að vinnsluskylda er ekki lengur skilyrði enda veiðar og vinnsla síðustu ár verið í þeim farvegi að langmest af makrílnum hefur farið í frystingu.