Haft var samband við lögregluna í Reykjanesbæ vegna grunsamlegrar tösku í suðurbyggingu flugstöðvar Leifs Eiríkssonar á veitingasvæðinu á hinu svokallaða non-Schengen-svæði.
Gerð hafði verið svokölluð snefilathugun á töskunni og reyndist niðurstaðan vera rauð. Þrátt fyrir að það sé ekki staðfesting á neinu var ákveðið að kalla lögregluna til.
Önnur snefilathugun var þá gerð á töskunni og þá reyndist niðurstaðan græn og fannst ekkert torkennilegt í töskunni, að sögn Guðjóns Helgasonar, upplýsingafulltrúa Isavia.
Lögreglan ákvað að nýta atvikið sem viðbragðsæfingu og meðhöndlaði töskuna þannig. Hundur var í för með lögreglunni.
Svæðið var ekki rýmt, heldur var fólk beðið um að vera ekki í kringum töskuna.
Guðjón segir að aldrei hafi hætta verið á ferðinni og að atburðurinn hafi ekki nein áhrif á flugferðir.
Starfsmaður frá öryggisstjórnstöð var á vettvangi til að upplýsa ferðamenn um hvað var að gerast.
Guðjón kveðst ekki vita hvaðan taskan kom. Minnir hann fólk á að passa vel upp á farangurinn sinn í flugstöðinni.