Myndarlegur borgarísjaki sést nú skammt undan landi við Siglufjörð. Áhöfn skips tilkynnti Veðurstofunni um jakann í morgun. Töluverður fjöldi tilkynninga um borgarísjaka, sem koma frá Grænlandi, hafa borist að undanförnu.
mbl.is fékk meðfylgjandi myndir sendar í dag sem sýnir ísjakann bera við himin á hafi úti. Fréttaritari mbl.is segir að jakinn sé „örstutt frá landi“.
Haraldur Eiríksson, veðurfræðingur á Veðurstofu Íslands, segir að vænta megi borgarísjaka á þessum árstíma en líklega megi þó segja að þeir séu óvenju margir í ár. Skip tilkynni um jaka sem verði á leið þeirra og fari svo að öllu með gát enda geti borgarísjakar reynst sjófarendum varasamir.
Vel er fylgst með borgarísjökum við Íslandsstrendur og tilkynningar um þá birtar hér.