Línudans við Dettifoss

Tveir franskir ofurhugar og einn Breti dönsuðu á línu yfir Jökulsá á Fjöllum rétt neðan við Dettifoss í gær og fyrradag. Þeir eru hluti af frönskum fjöllistahópi sem stundar það að ganga eftir línu víða um heim.

Greint var frá línudansi ofurhuganna á vefsíðunni 641.is.

„Sumt fólk var smeykt en flestir voru áhugasamir og spenntir,“ sagði Bjarni Karlsson, landvörður í Jökulsárgljúfrum, um athæfið. Mennirnir gengu á línunni, sem er 270 metra löng, í um hundrað metra hæð yfir Dettifossi.

Einn þremenninganna heldur af stað. Ljósmynd/Bjarni Karlsson

Hann sagði línudansinn ekki hættulegri en klettaklifur í öryggisbúnaði eða annað slíkt og að mennirnir væru fagmenn í því sem þeir gerðu.

„Hæðin vekur ugg hjá ýmsum, en þetta er enginn glæfraskapur eða fífldirfska, langt því frá.“

Bjarni sagði að fólk hefði fylgst áhugasamt með. Ljósmynd/Bjarni Karlsson

• Blogga um frétt