Stúdentspróf í tölvuleikjagerð

Menntamálaráðuneytið hefur heimilað Keili – miðstöð vísinda, fræða og atvinnulífs að fara af stað með nýja námsleið til stúdentsprófs. Er það í fyrsta sinn frá stofnun Keilis árið 2007 sem það er gert.

Námið er 200 framhaldsskólaeininga námsleið með áherslu á tölvuleikjagerð. Um er að ræða tilraunaverkefni og geta 40 nemendur hafið nám í haust. Keilir tekur þátt í Erasmus +-verkefni um sama efni og er í samstarfi við erlenda skóla sem hafa reynslu af slíkri kennslu að sögn Hjálmars Árnasonar, framkvæmdastjóra Keilis.

„Nýjar aðferðir náms til stúdentsprófs með áherslu á tölvuleikjagerð eru svar við kalli ungs fólks um að mennta sig á eigin forsendum en ekki kerfisins þar sem hinn fróði standi á kassa og messi yfir nemendum. Hvatning nemenda á að koma innan frá en ekki utan frá,“ segir Hjálmar í umfjöllun um mál þetta í Morgunblaðin í dag. Hann vonast til þess að námið komi til móts við þá nemendur sem finna sig ekki í hefðbundna skólakerfinu en slíkt eigi sérstaklega við um drengi í framhaldsnámi.