Guðni Th. Jóhannesson, forseti Íslands, átti fund með Vladimír Pútín, forseta Rússlands, í Pétursborg í morgun. Forsetarnir sækja báðir norðurslóðaráðstefnu, International Arctic Forum, sem hófst á mánudag. Fundinn sat einnig Kristján Þór Júlíusson, sjávarútvegs- og landbúnaðarráðherra.
Íslenska sendiráðið í Rússlandi greinir stuttlega frá fundinum á Facebook-síðu sinni og vel virðist fara á með forsetunum. Guðni hefur vakið athygli fyrir vasklega framkomu á ráðstefnunni en í gær ávarpaði hann ráðstefnugesti á rússnesku sem vakti mikla lukku hjá Pútín sem tók í höndina á Guðna eftir ávarpið.
Dagskrá Guðna er þéttskipuð og fyrr í dag heimsótti hann Ríkisháskólann í Pétursborg þar sem hann átti fund með rektor áður en hann flutti fyrirlestur undir heitinu „“We all protest!” Diversity, critique and freedom as the essence of historical research.“
Við háskólann er m.a. öflug norrænudeild sem stofnuð var að frumkvæði Míkhaíls Ívanovítsj Steblín-Kamenskíj árið 1958 en hann var mikilvirkur fræðimaður og þýðandi á vettvangi íslenskra fornbókmennta.
Síðar í dag mun forsetinn einnig hitta að máli forystufólk á sviði viðskipta milli Rússlands og Íslands.