Mestu eldingar frá upphafi mælinga

Þrumuveður næturinnar er það mesta frá því mælingar hófust. Á tæpum sólarhring, frá gærkvöldi og fram undir morgun, laust 1.800 eldingum niður á landi og landgrunni. Þórður Arason, eldingasérfræðingur hjá Veðurstofunni, segir að að jafnaði gerist það um einu sinni á ári að eldingafjöldi fari yfir 100 á sólarhring, en frá upphafi mælinga fyrir 20 árum hafi eldingafjöldi á sólarhring aldrei áður náð nema nokkrum hundruðum. Því sé ljóst að þrumuveðrið hafi verið það langstærsta síðan farið var að telja.

Frétt af mbl.is

Mikill fjöldi eldinga í nótt

Skýringin er hitaveður síðustu daga, en sterkt lóðrétt hitauppstreymi skapar skilyrði til eldinga. Íslendingar eiga ekki að venjast eldingum, en mest er um þær í hitabeltinu auk þess sem þær eru tíðar í Mið-Evrópu og Bandaríkjunum. Eftir því sem norðar dregur lækkar eldingatíðni hins vegar skarpt.

Aðspurður segir Þórður einhvern möguleika á frekara þrumuveðri næstu daga, en ekkert í líkingu við það sem var í nótt. Hann brýnir fyrir fólki hið fornkveðna, að halda sig inni við í þrumuveðri, inni í bíl eða húsi, og forðast berangur.

• Blogga um frétt