Áhugi á urriðum í ástarleik

Ástarævintýri Þingvallaurriðans voru í sviðsljósi um helgina þegar Jóhannes Sturlaugsson líffræðingur sagði frá stórfiskunum sem að undanförnu hafa komið til hrygningar í Öxará.

Fiskarnir eru gríðarstór flikki og sumir hafa gert sér ferð á hrygningarslóðina neðan við Öxarárfoss í áraraðir og eru því orðnir gamlir kunningjar ef svo mætti segja.

Alls mættu um 500 manns á svæðið á laugardaginn til að hlýða á frásagnir Jóhannesar og fylgjast með fangbrögðum hans við fiskana sem hann hefur rannsakað um langt árabil.