Brotist hefur verið inn í vinnuvélar bæði á höfuðborgarsvæðinu og á Norðurlandi í febrúar og hafa þeir sem voru að verki haft verðmæt GPS-tæki á brott með sér.
Lögreglan á höfuðborgarsvæðinu segir ekki ósennilegt að málin tengist þrátt fyrir að innbrotin hafi verið í sitthvorum landshlutanum, en brotist hefur verið inn í vinnuvélarnar að kvöld- eða næturlagi.
„Eigendur og umráðamenn vinnuvéla eru hvattir til að vera á varðbergi og gera ráðstafanir, t.d. að fjarlægja GPS-tæki úr vinnuvélum eftir því sem við verður komið, þ.e. þegar vélarnar eru ekki í notkun,“ segir í tilkynningu frá Lögreglunni á höfuðborgarsvæðinu.