Oddur Þórðarson
Víðir Reynisson, yfirlögregluþjónn almannavarnadeildar ríkislögreglustjóra, er sagður á batavegi eftir að hafa fengið lungnabólgu í kjölfar kórónuveirusmits. Hann er ennþá í einangrun.
Þórólfur Guðnason sóttvarnalæknir segir við mbl.is að hann hafi ekki heyrt í honum í dag en hann hafi frétt að Víðir hafi átt góðan dag í gær.
„Ég hef ekkert heyrt í honum í dag. Vonandi er þetta bara allt að koma hjá honum. Hann átti víst mjög góðan dag í gær, einn þann besta í langan tíma að mér skilst,“ segir Þórólfur.
Rögnvaldur Ólafsson aðstoðaryfirlögregluþjónn sagði í gær að óvíst væri hvenær Víðir losnaði úr einangrun og þá væri einnig óvissa um hvenær hann yrði nógu hraustur til að standa aftur í hringiðu heimsfaraldursins.