Icelandair selur og flytur af Nauthólsvegi

Icelandair hefur selt Reitum skrifstofuhúsnæði að Nauthólsvegi. Í sama húsi …
Icelandair hefur selt Reitum skrifstofuhúsnæði að Nauthólsvegi. Í sama húsi er Reykjavík Natura-hótelið. mbl.is/Ómar Óskarsson

Icelandair Group skrifaði í dag undir samning við fasteignafélagið Reiti um sölu á skrifstofuhúsnæði félagsins að Nauhólsvegi 50 við Reykjavíkurflugvöll. Söluverðið er tæplega 2,3 milljarðar króna og verður nýtt til uppgreiðslu áhvílandi láns á fasteigninni sem og til styrkingar lausafjárstöðu.

Icelandair mun þó leigja húsnæðið af Reitum til þriggja ára eða til loka árs 2023 og verður starfsemi félagsins enn í húsinu á því tímabili.

Að svo búnu mun félagið flytja starfsemi sína frá Nauthólsvegi á Flugvelli í Hafnarfirði þar sem félagið er nú þegar með hluta starfseminnar. Stefnir félagið að því að byggja við núverandi húsnæði á Flugvöllum svo að sameina megi starfsemi félagsins í Reykjavík og Hafnarfirði á einum stað, þ.e. í Hafnarfirði.

Haft er eftir Boga Nils Bogasyni, forstjóra Icelandair, í tilkynningu að með sölunni nái félagið fram rekstrarhagræðingu og styrki lausafjárstöðu sína en hvort tveggja komi sér vel á þessum krefjandi tímum. 

„Þá er spennandi að hefja uppbyggingu á nýjum höfuðstöðvum sem munu taka mið af þörfum starfseminnar nú og til framtíðar og mun reynsla okkar af sveigjanlegu vinnufyrirkomulagi á þessu ári án efa nýtast við skipulag og hönnun húsnæðisins. Ég tel að sameining starfsstöðva okkar á höfuðborgarsvæðinu muni án efa stuðla að öflugra samstarfi milli deilda, meiri starfsánægju og auknum árangri. Það verður jafnframt ótvíræður kostur að færa höfuðstöðvar félagsins nær Keflavíkurflugvelli,“ segir Bogi.

mbl.is