Skipulag í Úlfarsárdal verði óbreytt

Um 900 manns hafa skráð sig í undirskriftasöfnun þar sem mótmælt er breytingum á skipulagi í Úlfarsárdal í Reykjavík.

Eins og greint var frá í Morgunblaðinu á dögunum stendur til að á reit milli verslunar Bauhaus og efstu íbúðarhúsa í Úlfarsárdal verði þrifaleg atvinnustarfsemi. Þar er átt við rýmisfrekar verslanir, léttan iðnað og verkstæði; alls 200 þúsund fermetra. Tekið er fyrir íbúðarhúsnæði, gistiþjónustu og matvöruverslanir. Skv. gildandi deiliskipulagi frá 2013 er hins vegar gert ráð fyrir íbúðabyggð á svæðinu.

„Byggðin á þessu svæði öðlast allt annan svip verði aðalskipulagi þessa svæðis breytt,“ segir Björn Ingi Björnsson, formaður Íbúasamtaka Úlfarsárdals, í umfjöllun um þessi mál í Morgunblaðinu í dag. Hann bendir á að umrætt svæði snúi mót suðri og sól og sé síðasti óbyggði reiturinn í Reykjavík þar sem staðhættir séu slíkir.

„Síðustu ár hefur verið mikil uppbygging í Úlfarsárdal. Dalskóli er tilbúinn, verið er að byggja menningarmiðstöð og sundlaug auk þess sem uppbygging fyrir aðstöðu Fram er langt komin. Mikilvægt er að þessir innviðir nýtist,“ segir formaðurinn.