Bjartmar Leósson, sem hefur verið kallaður hjólahvíslarinn vegna vasklegrar framgöngu sinnar við að hafa uppi á stolnum hjólum borgarbúa, hefur nú glatað sínu eigin hjóli.
Hann óskar eftir liðsinni við að finna hjólið á Facebook-hópnum „Hjóladót tapað, fundið eða stolið“. Hjólinu var stolið í læstu anddyri hússins þar sem hann býr.
„Það er skrítið að hjóli sé stolið frá manni sem er a segja öllum hvernig á ekki að láta stela hjólinu sínu,“ segir Bjartmar kíminn.
„Það sást til manns á því umm fimm leytið í morgun uppí Hlíðum. Nú rúntar maður bara á þessa venjulegu staði og sér hvort maður finni ekki eitthvað, á þeim stöðum sem maður hefur fundið hin hjólin.“
Hjólinu var læst með áföstum lás. „Það vill þannig til að ég borgaði heilar tíu þúsund krónur fyrir mitt hjól á meðan félagi minn borgaði 270 þúsund fyrir rafmagns hlaupahjólið sitt og honum vantaði lás.“
„Ég gef honum U-lásinn minn haldandi að ég hafi tíma til að kíkja í hjólabúð á næstunni og kaupa lás. Sú var ekki raunin en ég var hins vegar með áfastan lás á hjólinu og það er mikið vesen að stela þannig hjóli, þú þarft að halda á því í burtu og saga svo lásinn af,“ segir Bjartmar.
Fjölmargir hafa þegar deilt færslunni, enda má ætla að Bjartmar eigi inni góðvild margra sem hann hefur komið til bjargar undanfarið.