Tóku út frétt vegna hatursorðræðu

Kjarninn tók út af vef sínum frétt sem unnin var upp úr viðtali við Lenyu Rún Taha Karim, varaþingsmanns Pírata, vegna persónuárása, rasisma og hatursorðræðu. 

Þetta segir Þórður Snær Júlíusson, ritstjóri Kjarnans, á Facebook-síðu miðilsins. 

„Þegar hluti af viðtalinu var tekin úr stærra samhengi í frétt urðu til viðbrögð á samfélagsmiðlum sem ég, sem ábyrgðarmaður alls efnis sem birtist á Kjarnanum, sá ekki fyrir. Viðbrögð sem ekki er hægt að lýsa öðruvísi en sem persónuárásum, rasisma og hatursorðræðu. Ömurleg ummæli sem mig setti hreinlega hljóðan við að lesa. “

Þórður segir að því hafi frétt úr viðtalinu kallað fram það sem viðtalið var að gagnrýna. 

„Með því bjó ég til aðstæður gagnvart viðmælanda sem treysti okkur fyrir sögu sinni sem létu hana verða fyrir því sem hún var að gagnrýna. Það er ekki í lagi.“

„Ansi margt fólk sem þarf verulega að hugsa sinn gang“

Brugðist var við með því að eyða ummælum á samfélagsmiðlum og loka síðan fyrir ný ummæli. 

Þórður segir að það hafi ekki dugað til og því var deilingum eytt og fréttin tekin úr birtingu.

„En það er ljóst að hér á landi er ansi margt fólk sem þarf verulega að hugsa sinn gang,“ segir í færslunni.

• 1 blogg um fréttina

Bloggað um fréttina

• Páll Vilhjálmsson: Ritstjóri Kjarnans líti sér nær