Stefán Eiríksson útvarpsstjóri segist í samtali við mbl.is vera sammála úrskurði fjölmiðlanefndar um að Ríkisútvarpið ohf. hafi brotið gegn lögum um Ríkisútvarpið með kostun á þáttunum Tónaflóð um landið, sem sýndir voru í sjónvarpinu sumrin 2020 og 2021.
„Eftir að hafa farið yfir þetta erum við sammála því sem þar kemur fram,“ segir Stefán en brotið snýst að því að þættirnir gætu ekki talist íburðarmiklir dagskrárliðir í skilningi undantekningarákvæðis 2. mgr. 7. gr. laga um Ríkisútvarpið.
Því hefðu þeir ekki heimild til þess að rjúfa dagskrá með auglýsingahléum.
„Þetta gerist í miðju Covid þegar að verið er að bregðast við með breytingum á dagskrá í samræmi við sóttvarnatakmarkanir. Það var ekki gætt nægilega vel að þessu í mati á því hvernig væri hægt að haga þessu,“ segir Stefán.
Taldi nefndin hæfilegt að stjórnvaldssekt vegna brotsins næmi 1.500.000 kr.