Vatn flæddi inn í Skautahöllina í Laugardal á þriðja tímanum í dag.
Svo virðist sem niðurföll við bygginguna hafi ekki haft undan og vatnið leitað inn í anddyri Skautahallarinnar en byggingin stendur nokkuð lágt í Laugardal.
Egill Eiðsson, forstöðumaður Skautahallarinnar, segir ekki um mikið vatn hafa verið að ræða og engar sjáanlegar skemmdir séu á byggingunni.
„Anddyrið er flísalagt svo þetta var ekkert alvarlegt. Við skófum þetta bara út af lægsta punktinum og yfir smá hæð sem þurfti að fara yfir til að koma þessu í burtu. Það var búið að redda málunum þegar slökkviliðið kom á svæðið.“
Egill segist ekki hafa upplifað leka með þessum hætti þau fjórtán ár sem hann hefur starfað í húsinu.