„Við erum komin til Jórdaníu. Við erum í öruggri höfn. Við erum ekki stríðshrjáðu landi og ekki í hættu á eldflaugaárás eða slíku. Við erum við landamærastöð í Jórdaníu og þetta hefur gengið vonum framar,“ segir Sigurður Kolbeinsson, fararstjóri hjá Kolumbus sem hefur unnið í alla nótt að því að koma hópi 85 ferðamanna frá Ísrael.
Raunar er hópurinn orðinn 90 manns því íslenska ríkið bauð fimm Færeyingum að koma með í flugið.
Í gær stóð til að hópurinn myndi fara með flugi klukkan rúmlega 9 í morgun eftir að borgaþjónustan bauð fram leiguvél frá Icelandair til að sækja fólkið. Það plan fauk hins vegar út um gluggann eftir að Ben Gurion flugvellinum í Tel Aviv var lokað vegna aukins hættuástands.
„Við unnum alla nóttina að þessu plani með borgaraþjónustunni, Icelandair og ísraelskum samstarfsmanni Kolumbus. Það voru óvissuþættir í þessu þar sem lendingarheimildin fékkst ekki fyrr en rétt fyrir klukkan 11. Síðan var annað vandamál að fá rútu í Jórdaníu því þær eru svo svakalega uppteknar vegna landflótta hingað. Nú erum við hins vegar komin inn í landið. Síðasta fólkið eru í þessu að teyma töskurnar sínar inn í landið. Við eigum bara eftir að sýna lögreglunni að við séum með passastimpil,“ segir Sigurður.
Næst tekur við tveggja til þriggja tíma rútuferð á flugvöllinn í Amman áður en flug FÍ1086 fer með hópinn til landsins.
Að sögn Sigurðar þurfti hann að senda skilaboð á hópinn í gærkvöldi að hann myndi ekki fara að sofa sökum óvissu sem var í lofti.
„Mín tilfinning reyndist rétt um að við myndum ekki geta farið í þetta flug. Síðan um eitt til hálf tvö fékkst staðfest að ekki væri hægt að fara í gegnum Ben Gurion flugvöllinn. Þá fékk fólk upplýsingar um að það gæti mætt til okkar klukkan hálf tíu. Í dag hefur svo allt staðist og við erum í öruggri höfn.“