Fimm gosop og hraunflæðið aðeins fjórðungur
Setja bókamerki
Áfram dregur úr krafti eldgossins við Sundhnúkagíga og er hraunflæðið gróflega áætlað um fjórðungur af því sem það var í byrjun. Þriðjungur upphaflegu sprungunnar er virkur.
Þetta kemur fram í tilkynningu frá Veðurstofu Íslands.
Einnig eru kvikustrókarnir lægri en í upphafi gossins, eða um 30 metrar þar sem þeir ná hæst. Þessar tölur byggja á sjónrænu mati úr könnunarflugi. Annað mælingaflug er á áætlun kl. 13 í dag og þar mun skýrari mynd fást af þróun virkninnar.
/mblvideo/innlend/93/245395_125402042.jpg)
Líkist gosum við Fagradalsfjall
„Þróun gossins svipar til eldgosa við Fagradalsfjall þar sem gossprungurnar eru byrjaðar að draga sig saman og mynda stök gosop. Á þessum tímapunkti eru um fimm gosop sem eru dreifð eftir upphaflegu sprungunni,” segir í tilkynningunni.
„Samkvæmt upplýsingum vísindafólks sem fór í seinna þyrluflug Landhelgisgæslunnar um kl. 4:00 í nótt hafði heildarlengd gossprungusvæðisins ekki breyst mikið frá því í upphafi. Lítil virkni var við suðurenda sprungunnar við Hagafell og mesta hraunrennslið leitar í austur í átt að Fagradalsfjalli. Tveir taumar ná í vestur, báðir norðan við Stóra-Skógfell,” segir þar einnig.
Möguleg gasmengun í Eyjum í dag
Fram kemur að í dag berist gosmökkur undan vestan- og norðvestanátt.
Gasmengunar gæti orðið vart í Vestmannaeyjum í dag, en ekki annars staðar í byggð. Samkvæmt veðurspá gæti gasmengunar jafnframt orðið vart á höfuðborgarsvæðinu seint í nótt eða í fyrramálið.
Verið er að vinna nýtt hættumatskort og verður það gefið út síðar í dag.
„Hætta á því að það dragi úr samstöðunni“
Eldgosinu er lokið
Vill ekki „aumingjalegar“ lækkanir á röngum tíma
Var sofandi þegar slökkvilið bar að garði
„Aðför að samfélaginu í heild sinni“
Þurfa að taka myndir áður en goslokum er lýst yfir
María Sigrún svarar Degi fullum hálsi