Vísbendingar eru um að land sé tekið að síga lítillega við Svartsengi.
Þetta segir Sigríður Kristjánsdóttir, náttúruvársérfræðingur á Veðurstofu Íslands.
Hún tekur sérstaklega fram að þetta sé „ekki sterkasta merkið sem ég hef séð“ um landsig. Aðeins örfáir mælar sýni fram á eitthvað landsig á svæðinu.
Aðspurð segir Sigríður að landsig „gæti þýtt að það fari bara alveg að gjósa“, en bendir þó á að jarðskjálftar séu algengari fyrirvari fyrir eldgos á Reykjanesskaganum.
Sigríður segir annars vegar að fyrir síðasta gos hafi land einnig sigið lítillega. Hins vegar hafi landris hægt á sér í síðustu viku en síðan aftur aukið við sig.
Færri jarðskjálftar hafa mælst í grennd við Grindavík síðustu daga og afar fáir yfir þremur að stærð.
Hvassviðri hefur vissulega haft áhrif á mæla Veðurstofu undanfarna viku.