Jarðskjálfti upp á 3,3 varð við Djúpavatn, 4,3 km norðnorðvestur af Krýsuvík, um fjögurleytið í nótt.
Alls hafa níu skjálftar orðið á svæðinu í nótt. Sá næststærsti mældist 2,6 að stærð.
Að sögn Sigríðar Magneu Óskarsdóttur, náttúruvársérfræðings hjá Veðurstofu Íslands, urðu einnig jarðskjálftar á svæðinu í byrjun vikunnar, auk þess sem einn varð þar í byrjun ársins sem mældist tæplega 4 að stærð.
Hún bendir á að þetta sé þekkt jarðskjálftasvæði og að ekkert bendi til þess að eitthvað fari að draga til tíðinda þar.
Rúmlega 20 smáskjálftar hafa orðið yfir kvikuganginum í nágrenni Grindavíkur, sem er svipað og á sama tíma í gær.