Innlent | mbl | 12.2.2024 | 0:07

Grindvíkingar gera athugasemdir

Grindvíkingar eru margir hverjir ekki sáttir við fyrirkomulag um kaup ríkisins á íbúðarhúsnæði í Grindavík. mbl.is/Kristinn Magnússon

Vel á annað hundrað athugasemda hafa borist í samráðsgátt stjórnvalda við drög að frumvarpi um kaup ríkisins á íbúðarhúsnæði í Grindavík. Grindvíkingar og atvinnurekendur í Grindavík hafa skrifað meginþorra athugasemdanna sem eru, þegar þetta er skrifað, alls 167.

Frumvarpið var kynnt á föstudag og lagt í samráðsgátt.

Í vikunni er fyrirhugað að fjármála- og efnahagsráðherra muni leggja það fyrir Alþingi.

Frétt af mbl.is

Kostar 60 milljarða að kaupa Grindavík

Lagt er til í frumvarpinu að einstaklingum standi til boða að selja félagi í eigu ríkisins íbúðarhúsnæði sitt í Grindavík.

Skilyrði er að eigandi hafi haft skráð lögheimili í viðkomandi eign þann 10. nóvember 2023. Frumvarpið nær ekki til húsnæðis í eigu lögaðila. Miðað er við að kaupverð nemi 95% af brunabótamati að frádregnum áhvílandi veðskuldum og að möguleikinn til að selja standi til boða frá gildistöku laganna til 1. júlí 2024.

Frétt af mbl.is

Atvinnuhúsnæði ekki keypt í Grindavík

Telja sig geta tapað milljónum

Af athugasemdum Grindvíkinga að dæma eru ekki allir á eitt sáttir með frumvarpið og er þar fjölda spurninga varpað fram. Til dæmis hvort tækifæri gefst til að fá endurmat á brunabótum.

Þá telja margir að ekki sé gætt að jafnræði í frumvarpinu og að íbúum sé mismunað. Þá telja einhverjir að 95% af brunabótamati sé ekki sanngjarnt og vilja að ríkið kaupi eign þeirra á 95% af fasteignamati.

Aðrir benda á að þeir muni tapa milljónum með þessu fyrirkomulagi og muni aldrei geta keypt sér sambærilega eign á suðvesturhorni landsins fyrir þann pening sem ríkið kaupir eign þeirra á.