Frá árinu 1983 til ársins 2000 greindust 143 einstaklingar hér á landi með HIV-smit, þar af voru 113 karlmenn og 30 konur.
Þetta kemur fram í svari heilbrigðisráðherra við fyrirspurn frá Andrési Inga Jónssyni, þingmanni Pírata.
Flestir greindust árið 1985, eða 16 talsins, þar af 15 karlar. Fyrsta HIV-smitið hérlendis greindist árið 1983.
Eitt andlát þar sem alnæmi var undirliggjandi dánarorsök var skráð árið 1985, tvö árið 1987 og tvö 1988.
Þar sem tölur um HIV-smit voru settar inn afturvirkt í smitsjúkdómaskrá frá 1983 til 1987 með tilkomu nýrra sóttvarnalaga þarf að setja fyrirvara við tölur um andlát á því tímabili þar sem alnæmi er undirliggjandi dánarorsök.
Á árunum 1990 til 2000 voru alls skráð 29 dauðsföll hérlendis þar sem alnæmi var undirliggjandi dánarorsök. Þar af voru karlar 27 talsins. Ellefu manns áttu lögheimili hér á landi við andlát.
Flestir létust árið 1993, eða átta talsins, þar af sjö karlar.