Álagning skattsins gerð opinber

Við álagningu eru gerðir upp ofgreiddir og vangreiddir skattar vegna fyrra árs auk þess sem lögð eru á gjöld, s.s. útvarpsgjald og gjald í framkvæmdasjóð aldraðra, að því er fram kemur í tilkynningu á vef skattsins.

Inneign er lögð inn á þann bankareikning sem skráður er hjá innheimtumönnum. Ef engar upplýsingar um skráðan bankareikning liggja fyrir er hægt að skrá nýjan eða breyta fyrri skráningu á þjónustuvef skattsins.

Skuld eftir álagningu er skipt niður á sjö gjalddaga. Innheimta skulda fer í gegnum launagreiðendur. Þeim er send krafa um að draga skuld frá launum hvers mánaðar.

Þeir sem það vilja geta samið um að gera nýja greiðsluáætlun og skipta greiðslunni á lengra tímabil.

Greiðsluáætlanir eru gerðar á mínum síðum á Ísland.is, að því er fram kemur á vef skattsins.

Greiðsluáætlun er gerð til að lækka mánaðarlega greiðslubyrði en á móti kemur hærri vaxtakostnaður.

Útbúnar hafa verið stuttar leiðbeiningar um hvernig lesa megi úr álagningunni á íslensku, ensku og pólsku, sem og bæklingar á íslensku og ensku. Þessar upplýsingar má nálgast á skatturinn.is.

Vanti upplýsingar á skattframtal sem viðkomandi telur að hafi áhrif á niðurstöður álagningar getur hann kært álagninguna. Kærufrestur er til 2. september næstkomandi.