Rannsókn á joðhag 2,5 ára barna er hafin. Markmið rannsóknarinnar er að mæla joðstyrk í þvagi 2,5 ára barna til að meta joðhag þeirra.
Þetta kemur fram í tilkynningu frá embætti landlæknis sem stendur að rannsókninni ásamt Háskóla Íslands, Heilsugæslu höfuðborgarsvæðisins og Þróunarmiðstöðvar íslenskrar heilsugæslu.
„Vegna minni joðneyslu fullorðinna er til skoðunar að nota joðbætt salt við brauðframleiðslu á Íslandi. Hins vegar er mikilvægt að aðgerðir til að bæta joðhag landsmanna skaði ekki viðkvæma hópa eins og ung börn. Því er þörf á upplýsingum um joðhag ungra barna til að meta hvort óhætt sé að mæla með notkun á joðbættu salti við brauðframleiðslu,“ segir í tilkynningu.
Þá segir að átta heilsugæslustöðvar taki þátt í rannsókninni og kynni hana fyrir foreldrum og forráðamönnum 2,5 ára barna sem koma með barnið sitt í skoðun.
Það eru heilsugæslustöðvarnar í Árbæ, Garðabæ, Glæsibæ, Hamraborg, Hlíðum, Höfða, Salahverfi og Sólvangi. Valfrjálst er að taka þátt í rannsókninni.
„Joð er mikilvægt steinefni sem við fáum í snefilmagni úr fæðunni. Það er nauðsynlegt fyrir myndun skjaldkirtilshormóna sem eru okkur mikilvæg, meðal annars á meðgöngu fyrir eðlilegan vöxt og þroska fósturs. Við fáum helst joð úr mjólkurvörum (fyrir utan ost) og mögrum fiski eins og ýsu og þorski,“ segir í tilkynningunni.
„Í rannsókn sem gerð var árin 2017-2018 greindist ófullnægjandi joðhagur meðal barnshafandi kvenna í fyrsta sinn. Einnig sýndu niðurstöður landskönnunar á mataræði árin 2019-2021 að fullorðnir fá almennt ekki nægilega mikið af joði.“