Hátt í 500 manns lögðu leið sína á ráðhústorgið á Akureyri í dag þar sem Katrín Jakobsdóttir forsetaframbjóðandi hélt svokallaða fjölskylduhátíð.

Bauð hún í pylsur og pönnukökur fyrir utan kosningamiðstöð sína við Brekkugötu á Akureyri.

Í bænum var 17 stiga hiti í dag, þó skýjað að mestu en það glitti í sólina seinni partinn. Séra Hildur Eir Bolladóttir stýrði dagskrá og Hjörleifur Hjartarson, tónlistamaður og rithöfundur, flutti kveðskap og tónlistaratriði.

Fyrrverandi ráðherrar flykktust á staðinn. Kristján Þór Júlíusson, fyrrverandi ráðherra Sjálfstæðisflokksins, og Valgerður Sverrisdóttir, fyrrverandi ráðherra Framsóknar, létu sig ekki vanta í pylsur og pönnukökur. 

Á viðburðinum voru til sölu bolir og húfur merktar „K“ fyrir Katrínu.