Drápu átta úr sömu fjölskyldu

ERLENT  | 14. nóvember | 8:30 
Vopnahlé tók gildi á Gaza í nótt eftir að samkomulag náðist milli Ísraela og Palestínumanna. 34 Palestínumenn voru drepnir af Ísraelsher á tveimur dögum. Þar á meðal átta úr sömu fjölskyldu. Af þeim voru fimm börn og tvær konur.

Vopnahlé tók gildi á Gaza-ströndinni í dag og heimildir AFP-fréttastofunnar herma að samkomulagið hafi tekið gildi klukkan 3:30 að íslenskum tíma í nótt, klukkan 5:30 að staðartíma, eftir að stjórnvöld í Egyptalandi komu að viðræðunum.

Samkvæmt samkomulaginu verða Palestínumenn að tryggja ró á Gaza og að mótmæli verði með friðsamlegum hætti. Ísraelum er gert að hætta árásum á Palestínumenn. 34 Palestínumenn hafa látist í árásum Ísraela undanfarna tvo daga og þar á meðal eru átta úr sömu fjölskyldunni. Átökin nú hófust með loftárás Ísraelshers á heimili háttsetts manns innan samtakanna Heilagt íslamskt stríð. Frá þeim tíma hafa Palestínumenn skotið yfir 350 eldflaugum yfir landamærin. 

Átta úr Abu Malhous-fjölskyldunni, þar af fimm börn og tvær konur, voru drepin í árás Ísraelshers á heimili fjölskyldunnar í Deir al-Balah. Ísraelar sögðu í gær að árásin hefði beinst að tveimur vígamönnum sem hafa verið að undirbúa eldflaugaskot. 

 

Þættir