Framkvæmdir við Fossvogsbrú hefjist eftir ár

INNLENT  | 8. desember | 13:36 
Framkvæmdir við nýja Fossvogsbrú ættu að hefjast í byrjun árs 2023, eða eftir rúmlega eitt ár, samkvæmt áætlunum Vegagerðarinnar. Vinningstillaga brúarinnar var kynnt í morgun, en verkefnið Aldan sem Efla verkfræðistofa, í samstarfi við BEAM Architects, stendur á bak við, hlaut flest stig dómnefndarinnar.

Framkvæmdir við nýja Fossvogsbrú ættu að hefjast í byrjun árs 2023, eða eftir rúmlega eitt ár, samkvæmt áætlunum Vegagerðarinnar. Vinningstillaga brúarinnar var kynnt í morgun, en verkefnið Aldan sem Efla verkfræðistofa, í samstarfi við BEAM Architects, stendur á bak við, hlaut flest stig dómnefndarinnar.

 

Bryndís Friðriksdóttir, svæðisstjóri Vegagerðarinnar á höfuðborgarsvæðinu, segir í samtali við mbl.is eftir að vinningstillagan var kynnt að nú taki við hönnunarferli sem Vegagerðin og verkefnastofa borgarlínu muni vinna.

Segir hún að Vegagerðin gefi sér ár í að hanna brúna og setja fram hönnunar- og útboðsgögn. Þannig sé horft til þess að farið verði í útboð seint á næsta ári og að framkvæmdir myndu svo hefjast beint í framhaldinu, eða í byrjun árs 2023.

 

mbl.is

Spurð út í tímaramma á framkvæmdinni sjálfri, þ.e. hvenær hægt væri að opna fyrir umferð yfir brúna, segir Bryndís að enn sé ekki búið að setja niður fastan tímaramma. Meðal annars muni Vegagerðin núna fara yfir vinningstillöguna, en þar átti að koma fram áætlaður framkvæmdatími og kostnaður.

„En við vonum að brúin geti verið klár árið 2023 eða í byrjun 2024,“ segir Bryndís. Hún ítrekar þó að það sé sett fram með fyrirvara.

 

Nú þegar vinningstillagan liggur fyrir er ekki úr vegi að spyrja Bryndísi hvernig henni lítist á tillöguna.

„Mér líst vel á þetta og leist vel á allar þrjár tillögurnar,“ segir hún og bætir við: „Þetta slær mig sem áhugavert mannvirki fyrir virka samgöngumáta og verður áhugavert kennileiti fyrir fólk á ferð í voginum.“

 

Hægt er að sjá kynningu á brúnni hér að neðan bæði í myndskeiðinu og með nánari upplýsingum í pdf-skjalinu.

Þættir