Veiði hófst í Laxá í Dölum í morgun. Á fyrstu tveimur tímunum var búið að landa fimm löxum og búið að missa þrjá fiska. Það vakti athygli í þessu hjónaholli sem opnar Dalina að bara konur höfðu veitt þá fiska sem komnir voru á land. Karlarnir voru ekki komnir á blað þegar þetta er skrifað.
Leiðindaatvik setti svip sinn á morguninn þar sem neðsti hluti Laxár var í algeru kakói og óveiðanleg fyrstu klukkutímana, frá Höskuldsstaðastrengjum og niður úr.
„Áin er í fullkomnu vatni og víða kominn fiskur. Auðvitað bæði skemmtilegt og skrítið að bara konurnar hafa fengið fisk, en það hlýtur að fara að koma tími á okkur karlana,“ sagði Stefán Sigurðsson í samtali við Sporðaköst.
„Við Harpa vorum óheppin að fá mest spennandi svæðið fyrsta morguninn og svo var þetta allt í kakó, en hún er að hreinsa sig núna.“
Ásdís Jónsdóttir veiddi fyrsta laxinn og fljótlega fékk Guðný María Jóhannsdóttir sinn fyrsta og þær Berglind Steinarsdóttir og Harpa Þórðardóttir lönduðu fallegum fiskum.
Hefð er fyrir því að fyrsta kvöldið þegar veiðimenn koma til að undirbúa opnun, að boðið er upp á brauðtertu. Sara Pétursdóttir hannar og smyr kökuna. Þetta eru miklir majoneshleifar og tilhlökkunarefni árlega að sjá nýja útgáfu. Kakan í ár þótti ekki bara ljúffeng heldur einstaklega smekkleg og skreytt alvöru flugum, sem um leið var ábending um hvaða flugur gætu virkað best.
Opnunin 2020 er alger andstæða opnunarinnar í fyrra. Þá kom enginn fiskur á land í opnunarhollinu. Nú hins vegar er allt að gerast og verður spennandi að fylgjast með Laxá í sumar.
Veiði hófst á Nessvæðinu í Laxá í Aðaldal í gær og var fjórum löxum landað eftir hádegi. Þá opnaði Hrútafjarðará fyrr í vikunni og komu tveir laxar á land í opnun þar. Var þar að verki Nils Folmer Jörgensen.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Víðidalsá | Stefán Elí Stefánsson | 4. september 4.9. |
101 cm | Laxá í Dölum | Hafþór Jónsson | 27. ágúst 27.8. |
102 cm | Haukadalsá | Ármann Andri Einarsson | 23. ágúst 23.8. |
103 cm | Laxá í Aðaldal | Birgir Ellert Birgisson | 12. ágúst 12.8. |
103 cm | Miðsvæði Laxá í Aðaldal | Máni Freyr Helgason | 11. ágúst 11.8. |
101 cm | Laxá í Aðaldal | Agnar Jón Ágústsson | 10. ágúst 10.8. |
101 cm | Laxá í Aðaldal | Richard Jewell | 9. ágúst 9.8. |