Flugbeittur þríkrókur millimetra fra auga

Útvarpsmaðurinn geðþekki og fluguveiðimaðurinn Jón Axel Ólafsson komst í hann krappan í veiðiferð í morgun. Hann var staddur ásamt eiginkonu sinni í Eystri Rangá. Snörp vindhviða greip þunga Snælduna hjá Jóni Axel og endaði hún í andlitinu á honum - einungis örfáa millimetra frá auganu.

Læknisaðstoð var veitt á Hellu. Þríkrókurinn náðist úr og augað slapp. Ljósmynd/Aðsend

Svo fast sat flugbeittur þríkrókurinn í holdinu að aka þurfti með útvarpsmanninn á heilsugæslustöðina á Hellu og þar var flugan tekin úr honum af lækni. 

María Johnson sá um veiðiskapinn á meðan á þessu stóð. Hún landaði fjórum í morgun. Ljósmynd/Aðsend

„Mér dauðbrá náttúrulega en allt fór þetta vel.  Sem betur fer var ég með gleraugu. Þetta hefði getað farið mun verr ef ég hefði ekki verið þau,“ sagði Jón Axel í samtali við Sporðaköst.

Á meðan að Jón Axel var á skurðarborðinu gerði María Johnson sér lítið fyrir og landaði fjórum löxum.

• Blogga um frétt

Seinustu hundraðkallar sumarsins