Þúsundasti laxinn var færður til bókar í Hofsá í Vopnafirði í gær. Svo góð hefur veiðin ekki verið í Hofsá frá árinu 2013, þegar 1160 laxar veiddust. Árin þar á milli voru erfið í Hofsá og höfðu margir áhyggjur af þróun mála í henni.
Það eru því gleðifréttir að þessi magnaða fluguveiðiá skuli á nýjan leik skila fjögurra stafa tölu.
Það hafa níu laxveiðiár komist í fjögurra stafa tölu þetta sumarið á móti einungis fimm sumarið 2019. Hvorugt árið telst gott ár þegar horft er til laxveiði, en þó var sumarið 2020 snöggtum betra en í fyrra.
Þegar horft er til þeirra aðgerða sem gripið var til í Hofsá síðustu ár er ljóst að sleppingar á laxi upp fyrir ófiskgengan Foss og gröftur á hrognum hefur skilað árangri. Hofsá varð fyrir miklum búsifjum í flóðum árin 2013 og 2014 en virðist nú loksins búin að jafna sig eftir þær hamfarir.
Einar Falur Ingólfsson blaðamaður ræddi við Jón Magnús Sigurðarson bónda á Einarsstöðum og formann Veiðifélags Hofsár, í ágúst og sáu menn þá í hvað stefndi. „Við finnum vel að Hofsá er að detta í sitt gamla góða far,“ segir Jón Magnús. „Smálaxinn hefur vantað síðustu ár en nú er hann mættur og bætist við öflugan stórlaxastofninn sem lætur sig ekki vanta.“
Lengd á laxi | Veiðisvæði | Veiðimaður | Dagsetning Dags. |
---|---|---|---|
102 cm | Hvítá við Iðu | Ársæll Þór Bjarnason | 19. september 19.9. |
101 cm | Víðidalsá | Stefán Elí Stefánsson | 4. september 4.9. |
101 cm | Laxá í Dölum | Hafþór Jónsson | 27. ágúst 27.8. |
102 cm | Haukadalsá | Ármann Andri Einarsson | 23. ágúst 23.8. |
103 cm | Laxá í Aðaldal | Birgir Ellert Birgisson | 12. ágúst 12.8. |
103 cm | Miðsvæði Laxá í Aðaldal | Máni Freyr Helgason | 11. ágúst 11.8. |
101 cm | Laxá í Aðaldal | Agnar Jón Ágústsson | 10. ágúst 10.8. |