Gleðin hefur verið við völd í Laxá í Dölum á opnunardegi. Fyrri vaktin gaf þrjá laxa og einn var misstur. Eins og sjá mátti á Sporðaköstum fyrr í dag var dagurinn dansaður í gang strax klukkan sjö í morgun.
Fyrstu laxarnir veiddust í Lambastaðakvörn upp úr klukkan tíu í morgun. Þar lönduðu Harpa Hlín Þórðardóttir og Stefán Sigurðsson fyrstu þremur löxunum og misstu þann fjórða. Þessir laxar tóku allir Sunray á strippi.
„Félagar okkar sáu fiska í morgun í Neðri–Kistu og í Mjóhyl. Við erum þar núna og höfum ekki orðið vör við fisk. En þetta er búið að vera frábært. Þegar við komum í hús beið okkar hin árlega brauðterta sem Sara Pétursdóttir gerir svo snilldarlega. Stebbi kallar hana Majonesdrottninguna. Nú er það svo að margir eiga erfitt með svefn út af spenningi áður en þeir fara í veiði. Stebbi sefur ekki út af spenningi að komast í brauðtertuna,“ sagði Harpa í samtali við Sporðaköst.
Það er í sjálfu sér ágætt að fá þrjá laxa á fyrstu vakt miðað við það sem hefur verið að gerast í opnunum. Laxá er í ágætu vatni og það er stærsti straumur á þessum sólarhring. Verður fróðlegt að sjá hverju það skilar.
Lengd á laxi | Veiðisvæði | Veiðimaður | Dagsetning Dags. |
---|---|---|---|
101 cm | Vatnsdalsá | Erlendur veiðimaður | 29. september 29.9. |
101 cm | Eystri-Rangá | Grzegorz Loszewski | 27. september 27.9. |
105 cm | Hvítá við Iðu | Katrín Tanja Davíðsdóttir | 24. september 24.9. |
101 cm | Víðidalsá | Jón Eðvald Halldórsson | 22. september 22.9. |
107 cm | Grímsá | Jón Jónsson | 22. september 22.9. |
101 cm | Miðfjarðará | Agnar Sigurjónsson | 22. september 22.9. |
101 cm | Hvítá við Iðu | Gunnar Pétursson | 20. september 20.9. |