Eldislax veiddist í Hafralónsá í sumar

Séra Þura með eldishrygnuna úr Laxahyl í Hafralónsá. Hún sagði …
Séra Þura með eldishrygnuna úr Laxahyl í Hafralónsá. Hún sagði þetta sjokk og um leið ömurlegt. Ljósmynd/ÓRG

Þann 29. ágúst veiddist 79 sentímetra hrygna í Laxahyl í Hafralónsá. Þessi stóri lax tók flugu sem heitir Jens og er skírð í höfuðið á Sigurði Jens, sem var á sínum tíma formaður veiðifélags Hafralónsár. Veiðimaðurinn var séra Þuríður Björg Wiium Árnadóttir sem er ekki bara sóknarprestur Hofprestakalls í Vopnafirði heldur einnig varaformaður veiðifélags Hofsár.

Leiðsögumaður með Þuru, eins og hún er kölluð, var Ólafur Ragnar Garðarsson. Hann sagði í samtali við Sporðaköst að grunsemdir hjá honum hefðu vaknað strax í baráttunni við fiskinn. „Hann svamlaði svo mikið í yfirborðinu og þetta var allt eitthvað svo skrítið. Þegar Þura landaði honum sá maður græna litinn eins og maður þekkti úr vinnu í fiskbúð frá því í gamla daga, þegar um var að ræða eldislax,“ sagði Óli í samtali við Sporðaköst.

Þessi mynd sýnir vel hversu illa farinn laxinn var. Sporðurinn …
Þessi mynd sýnir vel hversu illa farinn laxinn var. Sporðurinn sýnir greinileg merki um eldi. Hafrannsóknastofnun hefur staðfest að um eldislax er að ræða. Frekari rannsóknir standa yfir. Ljósmynd/ÓRG

Þura var fyrst í stað afar kát með fiskinn. „Svo sá maður að hann var illa farinn á sporði og uggum. Þá varð þetta bara ömurlegt og ég fékk pínu sjokk þegar ég áttaði mig á því að mögulega væri þetta eldislax. Þarna er maður í einhverri óspilltustu náttúru í heimi og lendir svo í þessu,“ sagði séra Þuríður í samtali við Sporðaköst í dag. Henni barst í morgun tölvupóstur frá Hafrannsóknastofnun, þar sem staðfest var að um eldislax væri að ræða.

„Maður berst svo á móti þessu eldi af því að maður óttast að þessi lax sem stöðugt er að sleppa úr kvíum, blandist laxinum okkar. Svo bara allt í einu verður þessi ótti að veruleika. Þetta er ömurlegt," upplýsti Þura.

Ólafur Ragnar leiðsögumaður, sá strax að eitthvað var athugavert við …
Ólafur Ragnar leiðsögumaður, sá strax að eitthvað var athugavert við baráttuna. Hann grunaði strax að um eldislax væri að ræða. Ljósmynd/ÓRG

Guðni Guðbergsson, sviðstjóri hjá Hafrannsóknastofnun staðfesti í samtali við Sporðaköst að um eldislax væri að ræða. „Frekari rannsóknir standa yfir og þá að öllum líkindum getum við séð hvaðan þessi hrygna er upprunnin,“ sagði Guðni.

Fleiri fiskar hafa borist stofnuninni og er verið að rannsaka þá, en oft tekur tíma að fá niðurstöðu úr erfðaefnisrannsóknum á borð við þær sem nú standa yfir á nokkrum fiskum.

mbl.is

Seinustu hundraðkallar sumarsins

Lengd á laxi Veiðisvæði Veiðimaður Dagsetning Dags.
100 cm Fossá Guðbjörn Gunnarsson 1. október 1.10.
101 cm Víðidalsá Nils Folmer Jörgensen 26. september 26.9.
104 cm Laxá í Dölum Sigurður Smárason 25. september 25.9.
100 cm Miðfjarðará Róbert G. Grímsson 24. september 24.9.
104 cm Stóra Laxá Rúnar Gauti Guðjónsson 23. september 23.9.
102 cm Víðidalsá/Fitjá Nils Folmer Jörgensen 19. september 19.9.
100 cm Eystri-Rangá Hannes Gústafsson 14. september 14.9.

Skoða meira