Axel Arnar Nikulásson fæddist á Akranesi 1962 en ólst upp í Keflavík. Hann lauk stúdentsprófi frá FS 1982, BA-gráðu í hagfræði frá East Stroudsburg University í BNA 1986 og MA-gráðu í stjórnmálafræði frá sama skóla 1988.

Axel Arnar Nikulásson fæddist á Akranesi 1962 en ólst upp í Keflavík. Hann lauk stúdentsprófi frá FS 1982, BA-gráðu í hagfræði frá East Stroudsburg University í BNA 1986 og MA-gráðu í stjórnmálafræði frá sama skóla 1988. Axel Arnar starfaði sem lögreglumaður og síðar verslunarstjóri, starfaði hjá KKÍ og hóf störf utanríkisráðuneytinu 1995. Hann hefur verið sendiráðunautur við Sendiráð Íslands í Peking frá árinu 2005. Axel Arnar er kvæntur Guðnýju Reynisdóttur ráðgjafa og eiga þau þrjú börn.

Sendiráð Íslands í Peking opnaði á dögunum nýja heimasíðu. Axel Arnar Nikulásson er þar sendiráðunautur og staðgengill sendiherra Íslands í Kína: "Það var orðið tímabært að endurnýja heimasíðuna en sú gamla hafði verið í notkun allt frá árdögum heimasíðugerðar," segir Axel og kímir. "Búið er að vinna að því að endurbæta útlit og uppsetningu vefsíðna allra sendiskrifstofa Íslands, með samræmdu útliti og með notendavænt aðgengi að leiðarljósi."

Stefnt er að því að heimasíða sendiráðsins í Kína verði lifandi miðstöð upplýsinga: "Síðan er bæði ætluð til kynningar á Íslandi fyrir kínverska ferðamenn og kínverskt viðskiptalíf, en ekki síður sem upplýsingaveita Íslendinga sem hyggja á ferðalög, nám eða viðskipti í Kína," segir Axel Arnar. "Meðal annars má finna á síðunni upplýsingar um vegabréfsáritanir, tengla á upplýsingasíður opinberra stofnana í Kína, auk tengla á kínverska vefmiðla, til að auðvelda aðgengi að upplýsingum um daglegt líf í Kína. Ekki hvað síst erum við með fréttir af viðburðum sem sendiráðið stendur fyrir, svo Íslendingar sem leið eiga um geta með auðveldum hætti fengið upplýsingar um hvað er á döfinni hverju sinni, og vonandi tekið þátt í uppákomum þegar það á við."

Sendiráð Íslands í Peking annast forsvar við Ástralíu, Nýja-Sjáland, S-Kóreu, Mongólíu og Víetnam, en stærstur hluti starfs sendiráðsins snýr þó að Kína þar sem umsvif Íslendinga aukast með hverju árinu: "Að mínu mati hefur sendiráðið leikið lykilhlutverk við að leiða saman íslenskt viðskiptalíf og kínverskt, einkum við að minnka þá hindrun sem tungumálaörðugleikar og fjarlægð geta skapað," segir Axel. "Fyrir nokkrum árum var sett á laggirnar viðskiptaþjónusta við sendiráðið. Þar hefur skapast mikill þekkingarauður og hefur þjónustan margsannað sig."

Íslendingum hefur farið fjölgandi í Peking, og var þar stofnað Íslendingafélag á síðasta ári. "Bæði námsmönnum og viðskiptafólki fer fjölgandi, en við áætlum að núna séu 29 Íslendingar búsettir í Peking, en margir eru búsettir hérna í skemmri tíma og því töluverðar sveiflur í fjölda Íslendinga hér," segir Axel. "Það er góð stemning í starfi Íslendingafélagsins, og mjög góð mæting á alla viðburði."

Árið hefur verið viðburðaríkt hjá sendiráðinu í Peking og fara umsvif sendiráðsins vaxandi: "Í desember fögnuðum við 35 ára afmæli stjórnmálasambands Íslands og Kína er utanríkisráðherra heimsótti landið. Ráðherra skrifaði þá m.a. undir yfirlýsingu um upphaf fríverslunarviðræna milli Kína og Íslands, en einnig var stofnaður samráðsvettvangur íslenskra fyrirtækja í Kína undir forystu sendiráðsins í desember," segir Axel. "Gangi allt að óskum verður Ísland fyrsta vestur-evrópska ríkið til að gera slíkan samning við Kína og munu samningaviðræður við kínversk stjórnvöld skipa stóran sess í starfi sendiráðsins á næsta ári."

Heimasíða sendiráðsins í Peking er á slóðinni www.iceland.org/cn.