Vongóð Leikstjóri Dreamgirls, Bill Condon, ásamt Jennifer Hudson, Beyonce Knowles og Danny Glover sem öll leika í myndinni.
Vongóð Leikstjóri Dreamgirls, Bill Condon, ásamt Jennifer Hudson, Beyonce Knowles og Danny Glover sem öll leika í myndinni.
SÖNGLEIKJAMYNDIN Dreamgirls , sem byggist lauslega á ferli stúlknasveitarinnar The Supremes, fær flestar tilnefningar til Óskarsverðlaunanna í ár, alls átta talsins. Óvænt þykir þó að myndin er ekki tilnefnd sem besta kvikmyndin.

SÖNGLEIKJAMYNDIN Dreamgirls , sem byggist lauslega á ferli stúlknasveitarinnar The Supremes, fær flestar tilnefningar til Óskarsverðlaunanna í ár, alls átta talsins. Óvænt þykir þó að myndin er ekki tilnefnd sem besta kvikmyndin. Þetta kom í ljós í gær þegar forseti Bandarísku kvikmyndaakademíunnar, Sid Ganis, og leikkonan Salma Hayek tilkynntu niðurstöðu Akademíunnar.

Kvikmyndin Babel í leikstjórn Alejandro González Iñárritu fær sjö tilnefningar, þ. á m. sem besta kvikmyndin. Aðrar myndir sem tilnefndar eru sem besta kvikmyndin eru The Departed , Letters From Iwo Jima , Little Miss Sunshine og kvikmyndin The Queen , sem fjallar um viðbrögð Elísabetar Englandsdrottningar við andláti Díönu prinsessu árið 1997.

Engin ein mynd þykir líklegri en önnur til að vinna þessi eftirsóttu verðlaun í ár þar sem Dreamgirls , sem hreppti Golden Globe verðlaunin í flokki söngva- og grínmynda fyrir stuttu, er ekki á listanum.

Mirren og Whitaker tilnefnd

Meðal leikara sem tilnefndir eru til verðlauna eru Helen Mirren, fyrir kvikmyndina The Queen , og Forest Whitaker, fyrir túlkun sína á Idi Amin í kvikmyndinni The Last King of Scotland . Bæði Mirren og Whitaker hrepptu nýverið Golden Globe-verðlaunin

Eddie Murphy og Jennifer Hudson eru tilnefnd fyrir hlutverk sín sem söngvarar í Dreamgirls. Murphy hefur aldrei áður verið tilnefndur til Óskarsverðlauna þrátt fyrir langan feril. Þá er Meryl Streep tilnefnd sem besta leikkonan fyrir leik sinn í kvikmyndinni The Devil Wears Prada, en þetta er í fjórtánda sinn sem hún fær óskarstilnefningu. Þar af hefur hún unnið tvisvar til verðlauna. Spænska þokkadísin Penelope Cruz er tilnefnd fyrir leik sinn í kvikmyndinni Volver , breska leikkonan Judi Dench fyrir túlkun sína á lævísum kennara í kvikmyndinni Notes on a Scandal og Kate Winslet fyrir kvikmyndina Little Children . Meðal karlleikara er Leonardo DiCaprio tilnefndur fyrir hlutverk sitt í kvikmyndinni Blood Diamond , Ryan Gosling fyrir Half Nelson , Peter O'Toole fyrir leik í myndinni Venus og Will Smith fyrir hlutverk sitt sem heimilislaus faðir í myndinni The Pursuit of Happiness .

Mörgum þykir líklegast að Forrest Whitaker hreppi verðlaunin sem besti leikarinn, þótt Peter O'Toole þyki vel að þeim kominn. O'Toole hefur sjö sinnum verið tilnefndur til verðlauna, en hefur aldrei unnið.

Scorsese og Eastwood keppa á ný um leikstjóraverðlaunin

Martin Scorsese er tilnefndur í flokki leikstjóra fyrir The Departed og keppir m.a. við Clint Eastwood. Báðir voru leikstjórarnir tilnefndir 2004 þegar Eastwood fór með styttuna heim. Hinir leikstjórarnir sem keppa við Scorsese og Eastwood eru Alejandro González Iñárritu fyrir Babel , Stephen Frears fyrir The Queen og Paul Greengrass fyrir United 93 .