Í settinu Inga Lind Karlsdóttir þulur og Hlynur Sigurðsson fréttastjóri.
Í settinu Inga Lind Karlsdóttir þulur og Hlynur Sigurðsson fréttastjóri.
[ Smellið til að sjá stærri mynd ]
Útsendingar á fréttum Morgunblaðsins hófust á SkjáEinum síðastliðið fimmtudagskvöld. Hlynur Sigurðsson, fréttastjóri, segist hafa fengið þrælgóð viðbrögð frá áhorfendum og að lagt sé upp úr léttum og snörpum fréttaflutningi.
Fyrsti fréttatími Morgunblaðsins á SkjáEinum fór í loftið í vikunni, en

hann verður á dagskrá SkjásEins kl. 18.50 alla virka daga og endursýndur kl. 21.50 samdægurs. Einnig verður hægt að horfa á hann á fréttavef Morgunblaðsins, mbl.is.

Undirbúningur hófst í byrjun september og kom Hlynur Sigurðsson fréttastjóri inn í þá vinnu fyrir tveim vikum. „Þetta hafa verið annasamar tvær vikur, að setja saman fréttapakkann og ákveða hvernig framsetningin ætti að vera,“ segir Hlynur.

„Sú vinna lagðist annars vegar á framleiðendur SkjásEins, Elínu Sveinsdóttur og Birnu Ósk Hansdóttur, og hins vegar á teymið hér á Morgunblaðinu, mig, fréttamennina Dag Gunnarsson og Bergþóru Njálu Guðmundsdóttur, tökumanninn Magnús Bergmann og Guðmund Ragnar Kristjánsson klippara.

Í grunninn er lagt upp með að búa til fréttatíma, þar sem fólk fær yfirlit yfir helstu fréttir dagsins og aðalatriðin eru dregin fram á léttan og snarpan hátt. Fréttatíminn byggist öðruvísi upp en fólk þekkir af hinum stöðvunum, því innslögin sem fylgja á eftir eru sjálfstæð og tengjast sjaldnast fréttayfirlitinu í upphafi, þó að það komi fyrir.“

Leitast verður við að draga upp mynd af mannlífinu á fjölbreyttan hátt, að sögn Hlyns. „Mannlegar fréttir verða stór liður í innslögunum í fréttatímunum. Við getum orðað það þannig að af fjórum til fimm innslögum verða þrjú mannlegar fréttir og alveg jafnmikið lagt upp úr þeim og öðrum úttektum fréttatímans.“

Einnig verður horft út fyrir landsteinana. „Við verðum með erlendar fréttir, sem við fjöllum um í nokkurskonar heimskringlu, eins og tíðkast á Sjónvarpinu. Það eru stuttar lesnar erlendar fréttir við myndskeið að utan. En auðvitað verður gerð undantekning á því ef það berast stórfréttir að utan.“

Hlynur er ánægður með viðbrögðin við fyrstu fréttatímunum. „Þau voru þrælgóð,“ segir hann. „Ég held að þeir leggist almennt vel í fólk. En ég vil gjarnan heyra um það sem betur má fara. Ég held að það sé líka eftirspurn eftir því að gera sjónvarpsfréttatímana aðeins snarpari.“

Um ástæðuna fyrir því að þessi útsendingartími var valinn segir Hlynur að það hafi einfaldlega ráðist af því svigrúmi sem myndaðist þegar eiginlegum fréttum á Stöð 2 lyki og íþróttir væru að hefjast. „Þar er tíu mínútna gluggi sem fylla má af fréttum áður en fréttatíminn hefst í Sjónvarpinu. Þannig að fréttaþyrst fólk þarf ekki að taka sér þessa pásu. Svo er fréttatíminn endursýndur um kvöldið og fólk getur horft á fréttatímann á Netinu.“

– Þetta verður bein útsending?

„Já, við munum keyra þetta í beinni útsetningu.“

– Og fréttirnar eru unnar í samstarfi við fréttastofu Morgunblaðsins?

„Já, það er mikill styrkur í því að hafa á bakvið sig stærstu og öflugustu fréttastofu landsins. Sú viðbót að búa til góðar sjónvarpsfréttir verður yfirstíganleg þegar baklandið er svona gott.“

– Er þetta langhlaup?

„Já, tvímælalaust. Auðvitað er þetta gert í tilraunaskyni til að byrja með til að sjá hvort fólk hafi smekk fyrir þessum stutta og snarpa fréttatíma. En vonandi kann fólk að meta þessa nýjung og þennan nýja tón sem verið er að slá í fréttaflutningi.“

pebl@mbl.is